सनातन परंपरेमध्ये वैश्वदेव ही एक अत्यंत पवित्र आणि महत्त्वपूर्ण नित्यकर्म परंपरा मानली जाते. प्राचीन काळी वैश्वदेव केल्याशिवाय भोजन ग्रहण केले जात नसे. मात्र कालांतराने, गेल्या काही दशकांमध्ये ही हवनपरंपरा हळूहळू लोप पावत गेली.

पूज्य गुरुदेवांनी या प्राचीन हवनविधीचे महत्त्व लक्षात घेऊन साधकांना सहज करता येईल असा सुलभ आणि शास्त्राधिष्ठित विधी तयार केला आहे. गेल्या तीस वर्षांपासून गुरुदेवांचे अनेक श्रोते आणि अनुग्रहित साधक या विधीनुसार नियमितपणे हवन साधना करीत आहेत.

साधकवर्गाची वाढती साधनारुची आणि त्यांची मागणी लक्षात घेऊन पूज्य गुरुदेवांनी हा हवनविधी ग्रंथरूपाने उपलब्ध करून दिला आहे. मंत्रोच्चारांसह हविर्द्रव्यांच्या आहुती अर्पण करताना अनेक साधकांना अंतर्मनातील शांती, प्रसन्नता आणि आध्यात्मिक समाधानाचा अनुभव प्राप्त होतो.

चित्शक्ती हवन व वैश्वदेव हा ग्रंथ केवळ हवनाची पद्धत सांगणारा नसून, प्राचीन वैदिक परंपरेशी साधकाला जोडणारा, अंतःशुद्धी आणि आध्यात्मिक उन्नतीचा मार्ग प्रशस्त करणारा एक उपयुक्त साधनाग्रंथ आहे.